اخبط دماغك فى الحيط

اخبَطْ دماغَكْ في الحيطةْ ...!
حتمًا و لزمًا ساعة الجدْ نقَفْ حبايب و قرايبْ
عزم الضرايب شد العزمْ م اسكندرية لحلايبْ
واقفين نواجه ظلم الليلْ و نحرس المال السايبْ
للغول نقول "عينك حمرا" و نقول كمان "شايبْ عايبْ" !
خَدِ النفاق مُونَةْ و أُجْرَةْ و حاضرنا بَلًّغْ للغايبْ
* * *
يا مصر دي لسّه بشايرْ و جَوْلَةْ مِنْ ألفين جَوْلَةْ
نقابتنا دِرْعْ نواجه بيهْ أشرار بتِنْهَشْ و عَتَاوْلَةْ
حب الوطنْ إننا نِدِّيهْ مش إننا ناخدُه مقاولةْ
حَبِّينا مصر و قَدِّمْنا مُحَاوْلَةْ ... و الحُب مُحَاوْلَةْ !
عاش اللي شارك في الإضراب و لا خافش من بطش الدولة !
* * *
يا كل أهل المحروسةْ اتعلموا الدرس بسرعةْ
قبل الجحيم ما يطال الكُلّ ْ و قبل ما تجِف التِّرْعَةْ
يا كل مظلوم في بلدنا ربك حيسعى لو تسعى !
إيد ويَّا إيد الإيد تِقْوى و إيد لوَحْدَهَا إيد خِرْعَةْ
إيد ويَّا إيد نصبح مارد يهزم جنود ابن القُزْعَةْ
* * *
عزم الضرايب شد الحيل و رفعنا ليه البرنيطةْ
بنبني للحق نقابــــــــــــــــة و آدي الجاروف و البَرْوِيطَةْ
ماشيين نغني "تحيا الشمس" و الغنوة تلحين "ابو عيطةْ" !
غنوتنا تهزم كل نشاز بيبث سِمُّهْ في الزِّيطةْ