♥♥♥♥ الشــــــــــرق ..... بيــــــرم التونســـى ♥♥♥♥

بسم الله الرحمن الرحيم

من قبل ما اكتب أنا عارف القول ضايع
والأجر بالتأكيد ذاهب حسب الشايع
والشتم حايجينى مسوجر من واد صايع
مهما انكويت بالنار والزيت برضك فنان

***
يا مصرى وانت اللى هاممنى من دون الكل
هزيل ويحسبك الجاهل عيان بالسل
من دى الكيوف اللى تصبر على كثر الذل
ونمت والعالم فايق قوم بص وطل
وشوف الشعوب واتغص ودوب وارجع انسان

***
واللى المنى وبكانى انت يا شامى
ع الأكل نازل طول عمرك بارد حامى
وقلت لى لما نهيتك مصرى حرامى
لحد ما الجزار خلا جرحك دامى
والله الخروف سايب معلوف ما يفوته جعان

***
والمغربى المسلم راخر أبو زر فاشوك
لما انتقدته فزع قالى يلعن …. بوك
ونا اللى قصدى أشوف قيده … يصبح مفكوك
لقيته فرحان به راضى طيب .. مبروك
خليك فقير دق البندير وكل التغبان

***
روح العراق راخر قول له كيف الاحوال
لا متى تفضل يا أخيينا بحزام وعقال
ما تعرف الجاز يستعمل غير للمشعال
ألطم بقى وقول ويايا الجاز أموال
وأوعى المداس يفلت تحتاس وتقول لى أمان

***
يا شرق فيك جو منور والفكر ظلام
وفيك حراره يا خساره وبرود أجسام
فيك سبعميت مليون زلمه لكن أغنام
لا بالمسيح عرفوا مقامهم ولا بالاسلام
هى الشموس بتخللى الروس كدا هو بتنجـان !!

""""" * """" * """""